अमरावती गार्डन क्लबची ४२ वी आमसभा संपन्न
डॉ. दिनेश खेडकर यांची अध्यक्षपदी फेरनिवड तर डॉ. रेखा मग्गीरवार सचिवपदी
यंदाच्या वर्षी दिनांक २४ जून २०२३ रोजी अमरावती गार्डन क्लबची ४२ वी आमसभा दुपारी ४:०० वा. श्री शिवाजी विज्ञानं महाविद्यालयाच्या सर सी व्ही रमण सभागृहात सम्पन्न झाली. सर्वप्रथम दिवंगत सभासदांना आणि त्यांच्या आप्तस्वकीयांना श्रद्धांजली अर्पण करण्यात आली व आमसभेचे पुढील कामकाज सुरु झाले. मा. अध्यक्ष डॉ. दिनेश खेडकर यांनी विषयपत्रीकेनुसार सर्वप्रथम ४१ व्या आमसभेचे इतिवृत्त आणि वर्ष २०२२-२०२३ चा अहवाल सादर करण्याची सचिव, डॉ. रेखा मग्गीरवार यांना विनंती केली. इतिवृत्त सभागृहाने मान्य केल्यानंतर, कोषाध्यक्ष डॉ. शशांक देशमुख यांनी जमाखर्चाचे विवरण सादर करून अंदाजपत्रक सभेसमोर मांडले. विस्तृत चर्चेनंतर सभागृहाने लेखा अहवालास कार्योत्तर मंजूरी दिली.
सर्व उपस्थित सन्माननीय सभासदांनी गतवर्षामध्ये या कार्यकारिणीने राबविलेल्या उपक्रमांचे भरभरून कौतुक केले. अमरावती आणि नांदेड येथे शेवंतीची लागवड व मशागत कार्यशाळा, वाईल्ड ग्लोरी – ऑनलाइन राष्ट्रीय प्रदर्शनी स्पर्धा, सिझनल प्लांट्स – लागवड व संवर्धन कार्यशाळा, एनव्हायर्नमेंटल व्हॉलंटीयरिंग – वार्षिक इंटर्नशिप प्रोग्राम, शेवंती पुष्प प्रदर्शन व फ्लोरेन्झा पुष्प प्रदर्शन असे अनेक उपक्रम राबविण्याचा जणू काही विक्रमच केला. या सर्व आयोजनांच्या माध्यमातून अमरावती गार्डन क्लबचे विदर्भस्तरीय कार्य आता राज्य आणि देश-विदेश पातळीवर पोहचले असून, यानिमित्ताने शहर परिसरातील नागरिकांनी फुलविलेल्या मनमोहक सृष्टिचा आनंद या सर्वांसाठीच आकर्षण ठरत असल्याचे गौरवोद्गार यावेळी सभासदांनी काढले.
वर्ष २०२३-२४ करिता कार्यकारिणीची निवड करण्यासाठी डॉ व्ही आर देशमुख यांनी निवडणुक अधिकारी म्हणून कार्य केले. डॉ दिनेश खेडकर यांच्या अध्यक्षतेतील कार्यकारिणीचे प्रभावी कार्य सुरु असल्यामुळे त्यांची अध्यक्षपदी फेरनिवड करण्यात यावी असा प्रस्ताव श्री नेमीचंद मांडवगडे यांनी सादर केला व डॉ सतिश अकर्ते यांनी त्यास अनुमोदन दिले. या प्रस्तावानुसार, डॉ. दिनेश खेडकर, प्राध्यापक वनस्पतिशास्त्र विभाग, श्री. शिवाजी विज्ञान महाविद्यालय, अमरावती यांच्याकडे पुनश्च अध्यक्षपदाची जबाबदारी देण्यात आली. त्याचप्रमाणे उपाध्यक्ष, डॉ. शशांक देशमुख, प्राचार्य श्री शिवाजी उद्यानविद्या महाविद्यालय, सचिव डॉ. रेखा मग्गीरवार आणि कोषाध्यक्ष श्री अनिल भोंडे सह सचिव डॉ. उमेश कनेरकर यांना कार्यभार सोपविण्यात आला. कार्यकारिणी सदस्य म्हणून श्री मयूर गावंडे, डॉ गजेंद्र पचलोरे, श्री अविनाश भोजापुरे, श्री अशोक हांडे आणि डॉ मोनाली घुरडे यांची देखिल निवड करण्यात आली.
नवीन अध्यक्ष आणि सचिवांनी येत्या वर्षभरात अनेक फ्लॉवर शो, कार्यशाळा आणि परिषद, आयोजित करण्याची योजना या प्रसंगी जाहीर केली. डॉ.व्ही आर घुरडे, श्रीमती उर्मी शाह, झोएब हसणजी, डॉव्ही आर देशमुख, श्रीमती निर्मलाताई देशमुख, डॉ. किशोर बोबडे, श्री नेमीचंद मांडवगडे, प्रा.सी एम देशमुख ,डॉ सुचिता खोडके या सर्व नामांकित सल्लागार समितीच्या मार्गदर्शनाने, अमरावती गार्डन क्लब विविध उपक्रमाद्वारे पर्यावरण संवर्धन आणि तरुणाई साठी बागकाम विषयी कौशल्य विकसित करण्यासाठी सज्ज आहे. नूतन कार्यकारिणी सदस्यांना आपापल्या क्षेत्रात मोठा अनुभव आहे. डॉ. दिनेश खेडकर हे प्रख्यात वनस्पतीशास्त्रज्ञ आहेत. त्यामुळे या कार्यकारिणीच्या निवडप्रक्रिये नंतर क्लबमध्ये नवी ऊर्जा आणि उत्साह येईल, अशी अपेक्षा आहे. क्लबला त्याच्या नवीन अध्यक्ष आणि कार्यकारिणी सदस्यांनी केलेल्या प्रयत्नांमुळे प्रचंड यशाची अपेक्षा आहे. अशा सर्व व्यक्तिमत्वांच्या तांत्रिक कौशल्यासह सदस्यांची कार्यप्रणाली क्लबला यशाच्या शिखरावर नेण्यासाठी सज्ज आहे.
गार्डन क्लब नेहमीच निसर्गाचे सानिध्य व आपली संस्कृती जपण्यास प्राधान्य देत असते, आपल्या कार्यामध्ये कुठेही व्यावसायिकता येऊ नये याची दक्षता क्लबचे सन्माननीय सदस्य घेत असतात. त्यामुळे सामाजिक कार्यामध्ये झोकून देणारे सभासद हि क्लबची जमेची बाजु आहे व त्यांच्या सहकार्यानेच भविष्यात क्लबची दिमाखदार वाटचाल सुरु राहील. विद्यार्थ्यानी निसर्गाच्या सान्निध्यात येवून त्याचे संवर्धन करावे यावर येणाऱ्या काळात भर दिला जाईल.
– डॉ दिनेश खेडकर, अध्यक्ष
