अंजनगाव सुर्जी येथील सारडा महाविद्यालयात टीसीएसचा कॅम्पस प्लेसमेंट ड्राईव्ह संपन्न
ग्रामीण क्षेत्रात पहिल्यांदाच एवढ्या मोठ्या प्रमाणात कॅम्पस प्लेसमेंट ड्राईव्ह
अंजनगाव सुर्जी ता प्रतिनिधी दि.२२
श्रीमती राधाबाई सारडा कला, वाणिज्य व विज्ञान महाविद्यालय, अंजनगाव सुर्जी येथे रविवारी टीसीएस चे युथ एम्प्लॉयमेंट प्रोग्रॅम अंतर्गत कॅम्पस प्लेसमेंट ड्राईव्ह संपन्न झाला. याकरिता मुंबई व नागपूर येथून टीसीएस कंपनीच्या तज्ञ अधिकाऱ्यांची एक पूर्ण टीम महाविद्यालयात आलेली होती. YEP (युथ एम्प्लॉयमेंट प्रोग्राम) अंतर्गत एकूण 98 विद्यार्थ्यांची प्रथम लेखी परीक्षा व नंतर मुलाखत घेण्यात आली यापैकी एकूण 49 विद्यार्थ्यांना प्लेसमेंट देण्यात आले.या कॅम्पस प्लेसमेंट ड्राईव्ह मध्ये सारडा महाविद्यालया सोबतच पी. आर. पोटे फार्मसी महाविद्यालय, अमरावतीचे 71 व केशरबाई लाहोटी महाविद्यालय, अमरावतीचे 16 विद्यार्थी सुद्धा सहभागी होते.टीसीएस ही कंपनी युथ एम्प्लॉयमेंट प्रोग्राम अंतर्गत ग्रामीण क्षेत्रातील महाविद्यालयांमध्ये पदवी शिक्षणातील अंतिम वर्षाच्या विद्यार्थ्यांना व नुकतेच पदवी झालेल्या विद्यार्थ्यांना एक महिन्याचे प्रशिक्षण देते. सारडा महाविद्यालयात जानेवारी महिन्यात टीसीएस चे अनुभवी व तज्ञ ट्रेनर श्री अशोक रामनानी, पुणे यांनी विद्यार्थ्यांना एक महिन्याचे प्रशिक्षण दिले होते.मागील पाच महिन्यांपासून टीसीएस चे प्रशिक्षण वर्ग व कॅम्पस ड्राईव्हचे महाविद्यालयात आयोजन करण्याकरिता महाविद्यालयातील सर्व प्राध्यापक, शिक्षक व शिक्षकेतर कर्मचारी यांनी दिवस-रात्र मेहनत केली. अंजनगाव सुर्जी सारख्या ग्रामीण क्षेत्रातील महाविद्यालयात प्रथमच इतक्या मोठ्या प्रमाणात कॅम्पस प्लेसमेंट ड्राईव्ह आयोजित करण्यात आले. या प्लेसमेंट ड्राईव्ह करिता महाविद्यालयातील प्राचार्य, शिक्षक व शिक्षकेतर कर्मचारी यांचेही मोलाचे योगदान लाभले. या प्लेसमेंट ड्राईव्हमुळे अंजनगाव सुर्जी परिसरातील विद्यार्थ्यांना प्रचंड प्रेरणा मिळेल व बेरोजगारीची भीषण समस्या सोडवण्यास मदत मिळेल.
